Ministrja Hoxha: Kosova dhe Kanadaja- miqësi shembullore

Ministrja e Integrimit Evropian, Dhurata Hoxha, ka pritur në takim, Ambasadorin e Kanadasë në Kroaci, jorezident për Republikën e Kosovës, Daniel Maksymiuk, me të cilin diskutoi për procesin integrues dhe angazhimi institucional në këtë drejtim.

Zbatimi i MSA-së, është detyrë me prioritet e Qeverisë, theksoi Ministrja Hoxha, duke theksuar se kjo Marrëveshje është kontrata e parë në mes të Kosovës dhe Bashkimit Evropian. Ministrja po ashtu, çmoi lartë përkrahjen e Kanadasë dhe miqësinë e saj, për qytetarët dhe shtetin e Kosovës, duke e quajtur, miqësi shembullore.

“Procesi integrues është prioritet konsensual i vendit tonë, i partive politike dhe institucioneve qendrore e lokale, pa dallim. Ne kemi dëshmuar se jemi gati për procesin e liberalizimit të vizave, kemi plotësuar të gjitha kriteret si dhe jemi gati të zbatojmë obligimet tjera që dalin nga marrëveshjet ndërkombëtare”, theksoi Ministrja Hoxha, duke shtuar se reformat e ndërmarra dhe intensifikimi i angazhimit institucional për procesin integrues janë gjithëpërfshirëse.

Ambasadori jorezident për Republikën e Kosovës, Daniel Maksymiuk, theksoi se përkrah përkushtimin e Kosovës për rrugën integruese, duke ofruar përkrahjen e vendit të tij në këtë proces. Kanadaja ka qëndruar dhe qëndron krah Kosovës, theksoi ai, si një vend mik që kontribuon edhe në integrimet në institucionet ndërkombëtare.

Ju pëlqen ky artikull? Klikoni këtu dhe na bëni like në Facebook për më shumë artikuj të tillë.